Ísfirðingar áttu 68 keppendur á 35. Andrésar andar leikunum sem fram fóru í Hlíðarfjalli dagana 21.-23. apríl. Keppnin fór fram í blíðskaparveðri og nægum snjó. Ísfirðingar stóðu sig með prýði, sérstaklega í skíðagöngu þar sem krakkarnir sópuðu að sér verðlaunum. Athyglisvert var líka að sjá hversu vel margir alpakrakkarnir stóðu sig þrátt fyrir að hafa sáralítið getað æft þennan veturinn. Þess má geta að sjónvarpsstöðin N4 tók viðtal við nokkra ísfirska keppendur og hefur það verið sýnt reglulega alla helgina. Ísfirðingurinn Arna Sigríður Albertsdóttir setti leikana á miðvikudagskvöld í troðfullri íþróttahöllinni á Akureyri. Það hefði mátt heyra saumnál detta, fólk andaði varla á meðan hún flutti ræðu sína. Þar sagði hún frá skíðaferli sínum og sviplegum endi hans. Hún gerði þetta stórkostlega vel og það sem meira var að hún náði til allra, barna jafnt sem fullorðinna, ekki síst þegar hún sagði að það væri ekkert aðalatriði að komast á verðlaunapall heldur bara að fá að upplifa stemmninguna á þessu einstæða móti. Ísfirðingarnir í salnum máttu vera stoltir af hetjunni sinni þetta kvöld og einnig þegar þeir sáu hana skíða á fullri ferð á einskíðinu sínu í brekkum Hlíðarfjalls dagana á eftir.