Aðalfundur SFÍ verður haldinn miðvikudaginn 27. maí klukkan 20.00 í skíðaskálanum í Tungudal.
Dagskrá fundarins er eftirfarandi:
1. Skýrsla stjórnar
2. Stjórn leggur fram skoðaða reikninga félagsins.
3. Umræður um skýrslu og reikninga.
4. Lagabreytingar
5. Kosning stjórnar fyrir næsta starfsár
6. Önnur mál
Hvetjum alla til að mæta!
Fimmtudagurinn gekk vel fyrir sig og svigmótið var keyrt í bakka 1 og 2 í Miðfelli. Aðstæður voru góðar en hlýtt í veðri og skúrir, svigbakkarnir voru saltaðir og héldu þeir sér vel í keppninni.
Á föstudag var gott veður, það hafði fryst undir morgun og hörð skel myndast ofan á blautum snjónum. Vegna þessa aðstæðna var keppni blásin af og frestað til laugardagsins.
Laugardagurinn gekk vel fyrir sig. Frábært færi, hart og gott en vindur og skafrenningur gerðu erfitt fyrir á köflum. Keppendur og starfsmenn létu það ekki á sig fá og kláruðu bæði stórsvigs og svig mót í dag með glæsibrag.
SFÍ átti fjóra keppnendur á mótinu, það voru þær Auður Ýr Alexíusdóttir, Árdís Níní Liljudóttir, Ásthildur Chiaophuang og Katrín Dalía Daníelsdóttir. Þær stóðu sig vel og fá góða reynslu í reynslubankann.
Á laugaradagskvöldi var UMÍ slúttað með kvöldverði og verðlaunaafhendingu á Logni á Hótel Ísafirði. Keppni sunnudagsins var blásin af vegna veðurs.
Heilt yfir frábært mót, við þökkum keppendum og gestum fyrir komuna og ekki síður þökkum við öflugu starfsfólki mótsins, foreldrum og velunnurum félagsins fyrir góð störf.
Hér má finna úrslit helgarinnar: Úrslit UMÍ
Nánar
Það er aldeilis við hæfi að SFÍ bjóði upp á gott gönguspor í tilefni Skíðaviku sem sett verður á morgun miðvikudag. Við höfum beðið eftir nægum snjó til að nota sporann sem keyptur var í vetur með Uppbyggingastyrk frá Ísafjarðarbæ.
Búið er að troða um 2 km spor á Siggatúni og 4,3 km spor í Tunguskógi. Vonandi verður svo áframhaldandi blíða eins og á meðfylgjandi myndum og að allir nýti sér sporið yfir páskana.
Gleðilega páska!
Nánar
Skíðablaðið 2026 er komið út. Skíðabörn bera eintök út í hús þessa dagana.
Forsíðumyndirnar eru tvær, af ólympíuförunum Degi Benediktssyni og Örnu Sigríði Albertsdóttur. Í blaðinu eru viðtöl við þau og fjölmargar aðrar greinar af ýmsu tagi. Fjölmörg fyrirtæki styðja útgáfu blaðsins sem Skíðafélag Ísfirðinga er þakklátt fyrir.
Sigríður Lára Gunnlaugsdóttir fór fyrir ritnefnd blaðsins eins og fyrri ár.
Blaðið er hægt að lesa hér á vefnum, undir Útgefið efni, en þar er hægt að lesa Skíðablöð aftur til 1948 auk blaðsins Ferskí sem lengi var gefið út til að styrkja ferðasjóð skíðaiðkenda.
Nánar
Skíðafélag Ísfirðinga stefnir að því að verða fyrirmyndafélag ÍSÍ til að styrkja starfsemi félagsins og tryggja að hún byggist á fagmennsku, öryggi og skýrum gildum. Með því viljum við skapa enn betra umhverfi fyrir iðkendur, þjálfara, sjálfboðaliða og foreldra, þar sem áhersla er lögð á virðingu, gleði, jafnrétti og jákvæða upplifun allra sem koma að starfinu.
Markmiðið er að efla félagið til framtíðar, bæta skipulag og umgjörð og sýna að Skíðafélag Ísfirðinga vill vera traustur og öflugur vettvangur fyrir íþróttastarf á Ísafirði og nágrenni. Vinnan við fyrirmyndafélag er því mikilvægur þáttur í að byggja upp sterkt og heilbrigt félag fyrir börn, ungmenni og samfélagið allt.
Stjórn hefur unnið markvisst undanfarna mánuði að þessari viðurkenningu og er vinnan nú vonandi á lokametrunum. Allar upplýsingar um fyrirmyndafélagið er að finna hér á heimasíðu SFÍ undir Fyrirmyndafélag og verða frekari gögn sett þar inn jafnóðum.
