Skíðablaðið 2024 komið út og öll eldri skíðablöð líka

Forsíða Skíðablaðsins 2024

Skíðablaðið 2024 er komið út í aðdraganda skíðaviku. Blaðið kom síðast út árið 2019 en í faraldrinum datt takturinn á útgáfunni niður. Blaðið er veglegt og blandar saman frásögnum úr nútíð og fortíð. Blaðið er eins og áður bæði skemmtilegt aflestrar, góð heimild og mikilvæg fjáröflun fyrir Skíðafélag Ísfirðinga. 

Blaðið er þessa dagana borið út í hús á Ísafirði en einnig er hægt að nálgast eintak í skíðaskálum. 

Einnig hefur talsverð vinna verið lögð í að safna eldri skíðablöðum og skanna inn þau sem ekki eru til á rafrænu sniði. Elstu blöðin eru frá 1948 og 1949, en svo hefur skíðablað verið gefið út einu sinni á ári síðan á áttunda áratugnum, að nokkrum árum undanskildum. Um þessa sögu er einmitt stutt grein í Skíðablaði ársins, á blaðsíðu 45. Blöðin er hægt að sjá undir SFÍ->Útgefið hér á Snjor.is, þar með talið blað ársins. 

Dalvíkingar sigursælir á fyrsta degi bikarmóts í Tungudal

Verðlaunahafar í flokki drengja 14-15 ára; Kári Freyr, Óskar Valdimar og Arnór Atli

Skíðafélagstertan!

Glaðbeittir starfsmenn

« 1 af 3 »

Í dag fór fram bikarmót unglinga í alpagreinum í Tungudal. Keppt var í svigi og á morgun verður mótinu framhaldið og verður þá keppt í stórsvigi. Mótshald gekk eftir áætlun og stóðu keppendur sig mjög vel í þeim krefjandi aðstæðum sem allur nýji snjórinn hefur skapað í skíðabrekkunum.

Keppni hófst fyrir hádegi á flokki 14-15 ára. Sigurvegari í stúlknaflokki var Hrefna Lára Zoëga ÚÍA, í öðru sæti Ásta Kristín Þórðardóttir Ármanni og í þriðja sæti Snædís Erla Halldórsdóttir Víkingi. Í drengjaflokki sigraði Óskar Valdimar Sveinsson Dalvík, í öðru sæti Kári Freyr Orrason Ármanni og í þriðja sæti Arnór Atli Arnórsson KR.

Eftir hádegi var keppt í flokki 12-13 ára. Hjá stúlkunum sigraði Lára Elmarsdóttir Van Pelt Víkingi, í öðru sæti Silvía Mörk Kristinsdóttir Skíðafélagi Akureyrar og í þriðja sæti Eyrún Hekla Helgadóttir Dalvík. Sigurvegari í drengjaflokki var Barri Björgvinsson Dalvík, í öðru sæti Sævar Kári Kristjánsson Víkingi og í þriðja sæti Óliver Helgi Gíslason Ármanni.

Eftir keppni dagsins var verðlaunahátíð í íþróttasalnum á Austurvegi þar sem keppendum og öðrum gestum var boðið upp á tertur í tilefni þess að á árinu eru liðin 90 ár frá stofnun Skíðafélag Ísfirðinga.

Fylgjast má með stórsvigskeppni morgundagsins með lifandi tímatöku hér: Lifandi tímataka 

Fyrsti keppnisdagur Skíðamót Íslands

Nú er fyrsta degi á Skíðamóti Íslands lokið. Þrátt fyrir brösulegt start með frestunum og breytingum vegna veðurs þá gekk allt upp í dag og við vonum að keppendur og starfsfólki hafi verið ánægt með daginn.

Íslandsmeistari kvk í 10km frjálsri aðferð er Kristrún Guðnadóttir önnur í mark var María Kristín Ólafsdóttir og þriðja var Sigríður Dóra Guðmundsdóttir. Þær koma allar úr Ulli.

Í karlaflokki sigraði Dagur Benediktsson, annar var Snorri Einarsson og þriðji var Ævar Freyr Valbjörnsson. Dagur og Snorri keppa báðir fyrir Skíðafélag Ísfirðinga en Ævar Freyr fyrir Skíðafélag Akureyrar.

10 lið tóku þátt í liðakeppninn. Fyrsta lið í mark var lið Strandamanna, SFS, annað lið í mark var lið Skíðafélags Ísafjarðar, SFÍ og þriðja lið í mark var lið Ullunga

Hér má sjá úrslit dagsins í10km skauti kvenna og karla og svo í liðakeppninni hjá 13-16 ára.

Á morgun verður keppt í hefðbundinni aðferð.

13-14 ára fara 3,3km 15-16 ára fara 5km og 17 ára og eldri fara 15km

það er hópstart sem þýðir að öllum keppendum, í hverjum flokki fyrir sig, er startað saman. Það verður því æsispennandi að fylgjast með og má búast við harðri keppni.

Við þökkum fyrir daginn og hlökkum til að sjá ykkur á Dalnum á morgun.

Bikarmót alpagreinar: Lifandi tímataka

Hér er hægt að fylgjast með lifandi tímatöku og úrslitum frá Bikarmóti 12-15 á Ísafirði dagana 24.-25. mars 2024

Hlekkur: Lifandi tímataka alpagreinar SFÍ

Uppfærða dagskrá mótsins er að finna hér.

Skíðaveisla á Ísafirði - 90 ára afmælismót SFÍ

Skíðafélagið fagnar eins og áður hefur komið fram 90 ára afmæli. Nú er komið að fyrstu hátíðarhöldunum í tilefni þess en félagið heldur 90 ára Afmælismót á Ísafirði næstkomandi helgi, dagana 21.-24. mars.

Haldið verður Skíðamót Íslands í skíðagöngu á Seljalandsdal og Bikarmót í alpagreinum í Tungudal. Sannkölluð skíðaveisla framundan en gert er ráð fyrir í kringum 160 keppendur samanlagt og má með sanni segja að páskarnir komi snemma á Ísafirði í ár.

Undirbúningur mótanna hefur staðið yfir í allann vetur. Mótahaldi fylgir mikil vinna duglegra félagsmanna. Foreldrar núverandi, fyrrverandi og verðandi iðkenda sem og aðrir velunnarar félagsins hafa svo sannarlega lagt sitt á vogarskálarnar. Það má segja að nú fari fram ákveðin kynslóðarskipti innan félagsins þar sem "gamlir" SFÍ foreldrar kenna þeim nýju að halda mót og að gera það vel.

Við verðum dugleg að sýna frá keppnum helgarinnar á samfélagsmiðlum okkar en við viljum hvetja sem flesta til að koma og styðja skíðafólkið okkar, sjáumst á dalnum um helgina!

Uppfærð dagskrá Skíðamóts Íslands má finna hér

Dagskrá Bikarmóts má finna hér