Foreldrafundur

Foreldrafundur verður haldin mánudagskvöld 20. janúar kl. 20.00 í skíðaskálanum í Tungudal. Á dagskrá eru mál er varða störf Andrésarnefndar. Einnig verða tæpt á rekstri sjoppu í skíðaskála og síðast en ekki síst væntanlega sameiginlega gistihelgi 9-12 ára alpa- og göngukrakka í skíðaskálanum.

Alþjóðlegi snjódagurinn

Á morgun sunnudaginn 19. janúar er alþjóðlegi snjódagurinn svokallaði. Dagurinn er haldinn að undirlagi alþjóða skíðasambandsins, FIS og er haldinn hátíðlegur um allan heim. Skíðasvæði Ísfirðinga tekur myndarlega þátt og hefur undirbúið allar brekkur vandlega, sett upp brettabraut og bíður upp á smá veitingar einnig. Í Tungudal verður síðan opnuð s.k. Latabæjarbraut fyrir yngstu kynslóðina. Allir á skíði á morgun!

Bikarmót í göngu - úrslit

Bikarmót í göngu er nú í fullum gangi á Seljalandsdal og er keppni lokið á laugardegi þegar þetta er ritað. Keppni hefur gengið afar vel báða dagana og glæsileg tilþrif verið sýnd.

Úrslit þessara tveggja daga er hægt að nálgast hér.

Á morgun, sunnudag, verður keppni svo lokið með keppni í frjálsri aðferð þar sem gengnir eru 3,3 km. (aldursflokkar 12-13 ára), 3,75 km. (14-15 ára), 5 km. (16-17 ára), 7,5 km. (konur 18+) og 10 km. (karlar 18+).

Fjarnám í þjálffræði

Vorfjarnám ÍSÍ í þjálfaramenntun hefst í febrúar.  Boðið verður upp á nám á 1. 2. og 3. stigi ÍSÍ sem er alm. hluti þekkingar íþróttaþjálfara og gildir fyrir allar íþróttagreinar. Vakin skal sérstök athygli á því að í fyrsta sinn er nú nám á 3. stigi í boði sem er sjálfstætt framhald náms á 1. og 2. stigi.  3. stig ÍSÍ er síðasta stigið á framhaldsskólastigi.  Alls fimm kennarar koma að kennslunni á þessu stigi með sérþekkingu á því efni sem þeir kenna s.s. í íþróttasálfræði, íþróttameiðslum, íþróttastjórnun o.fl.  Áhersla og kröfur samfélagsins til menntunar í þessum fræðum hafa síður en svo dvínað og því afar mikilvægt að íþróttahreyfingin svari kalli og hafi menntaða íþróttaþjálfara innan sinna raða.

Frekari uppl. á isi.is og hjá Viðari Sigurjónssyni á vidar@isi.is og/eða í síma 460-1467.

Skíðamaður ársins 2013

Guðmundur Sigurvin Bjarnason fæddur 1997 er skíðamaður ársins hjá SFÍ

Guðmundur Sigurvin Bjarnason var afar sigursæll á nýliðnu ári. Auk fjölmargra sigra á heimamótum tók hann þátt í 8 göngum á bikarmótum Skíðasambands Íslands og hlaut í þeim alls fern  gullverðlaun og fern silfurverðlaun. Guðmundur varð bikarmeistari Skíðasambands Íslands í sínum aldursflokki, auk þess að verða fjórfaldur Íslandsmeistari 15-16 ára unglinga. Hann toppaði svo frábæran vetur með því að verða fyrstur allra keppenda í mark í 20 km göngu Fossavatnsgöngunnar. Hann hefur stundað gönguskíðin frá 1.bekk grunnskóla

Guðmundur er mikill fyrirmyndarunglingur. Hann er reglusamur og stundar æfingar af áhuga og samviskusemi.  Auk skíðagöngunnar tekur hann virkan þátt í starfi Björgunarfélags Ísafjarðar þannig að óhætt er að segja að hann sé öðrum, bæði yngri og eldri, frábær fyrirmynd.